شگئی کرکٹ گراؤنڈ میں 15 اکتوبر سے جاری کرکٹ میلہ اختتام پذیر ہوگیا۔ ٹورنامنٹ میں ضلع بھر سے 10 ٹیموں نے حصہ لیا، جبکہ فائنل مقابلہ ڈی سی مہمند اور صافی کرکٹ ٹیموں کے درمیان کھیلا گیا۔
فائنل میں صافی کرکٹ ٹیم نے پہلے بیٹنگ کرتے ہوئے مقررہ 8 اوورز میں 132 رنز بنائے۔ جواب میں ڈی سی مہمند کی ٹیم نے جارحانہ بیٹنگ کا مظاہرہ کرتے ہوئے مطلوبہ ہدف آخری اوور میں حاصل کرلیا اور ٹرافی جیت لی۔
ڈی سی مہمند کی کامیابی میں نعیم پھٹان نے اہم کردار ادا کیا۔ انہوں نے شاندار بیٹنگ کرتے ہوئے 50 رنز اسکور کیے اور اپنی ٹیم کو فتح دلانے میں نمایاں کردار ادا کیا۔ دوسری جانب صافی ٹیم کے فاسٹ باؤلر عبداللہ نے مسلسل تین گیندوں پر تین وکٹیں حاصل کرکے ہیٹ ٹرک کی، تاہم ان کی عمدہ باؤلنگ بھی ٹیم کو شکست سے نہ بچا سکی۔
فائنل میچ کے مہمانِ خصوصی ڈپٹی کمشنر مہمند بلال شاہد راؤ نے کامیاب ٹیموں اور نمایاں کارکردگی دکھانے والے کھلاڑیوں میں انعامات تقسیم کیے۔ تقریب میں ایڈیشنل کمشنر افتخار، ایڈیشنل کمشنر شکیل خان، ایس پی پولیس لیاقت خان، پولیس اہلکاروں اور شائقینِ کرکٹ کی بڑی تعداد نے شرکت کی۔
اس موقع پر خطاب کرتے ہوئے ڈپٹی کمشنر بلال شاہد راؤ نے کہا کہ کھیل صحت مند معاشرے کی تشکیل، نوجوانوں کو مثبت سرگرمیوں کی جانب راغب کرنے اور ان کی صلاحیتوں کو نکھارنے میں اہم کردار ادا کرتے ہیں۔ ضلعی انتظامیہ نوجوانوں کو کھیلوں کے بہتر مواقع فراہم کرنے کے لیے مستقبل میں بھی ایسے ٹورنامنٹس منعقد کرائے گی تاکہ مقامی کھلاڑی اپنی صلاحیتوں کا مظاہرہ کرکے علاقے اور ملک کا نام روشن کرسکیں۔
انہوں نے کہا کہ شگئی کرکٹ گراؤنڈ میں مزید ترقیاتی کام کیے جائیں گے، جبکہ گراؤنڈ کو بہتر بنانے کے ساتھ کھلاڑیوں اور تماشائیوں کے لیے ضروری سہولیات بھی فراہم کی جائیں گی۔ ان کے مطابق کرکٹ کے علاوہ دیگر کھیلوں کے فروغ پر بھی توجہ دی جائے گی اور ہر تحصیل کے کھلاڑیوں کو کھیلوں کا سامان فراہم کرنے کے لیے اقدامات کیے جائیں گے۔
ڈپٹی کمشنر نے کہا کہ کھیلوں میں ہار اور جیت معمول کا حصہ ہیں، اس لیے شکست کھانے والی ٹیموں کو مایوس ہونے کے بجائے مزید محنت کرکے آئندہ مقابلوں کی تیاری کرنی چاہیے۔ انہوں نے ضلع مہمند میں کھیلوں کے فروغ کے لیے مزید بڑے ایونٹس منعقد کرانے کے عزم کا اظہار کیا۔
تقریب کے اختتام پر ڈپٹی کمشنر نے فاتح ڈی سی مہمند کرکٹ ٹیم کے لیے ایک لاکھ 75 ہزار روپے جبکہ رنر اپ صافی کرکٹ ٹیم کے لیے ایک لاکھ روپے نقد انعام دینے کا اعلان کیا۔ شاندار کارکردگی پر نعیم پھٹان کو مین آف دی میچ قرار دیا گیا۔
مقامی حلقوں نے شگئی کرکٹ گراؤنڈ میں منعقدہ اس ٹورنامنٹ کو نوجوانوں کے لیے مثبت سرگرمیوں کے فروغ اور کھیلوں کے میدان آباد کرنے کی جانب ایک اہم پیش رفت قرار دیا۔
